Şrift ölçüsü:
A+
A
A-
Kr
10 Mart 2015

QAT-ın iki üzvü Tərtərdə həbs olundu

Akif Nağı baş prokurora və daxili işlər nazirinə müraciət etdi

Qarabağ Azadlıq Təşkilatının (QAT) Tərtərdə yaşayan iki üzvü - Zülfüqar İbrahimov və Vüqar Əliyev martın 10-u, səhər saatlarında saxlanılıb.

Bu barədə QAT-ın mətbuat xidmətindən musavat.com-a verilən məlumatda bildirilir. QAT sədri Akif Nağı bu işin tam ədalətsizlik olduğunu və bununla bağlı Daxili işlər naziri Ramil Usubova və Bas prokuror Zakir Qaralova müraciət etdiyini deyib.

Təşkilat sədrinin müraciətində göstərilir: “Qarabağ Azadlıq Təşkilatının üzvləri İbrahimov Zülfüqar Davud oğlu və Əliyev Vüqar Sabir oğlu bu gün səhər Tərtər şəhərində Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinin əməkdaşları tərəfindən öz evlərində həbs ediliblər. Müəmmalı şəraitdə və şahidlərin iştirakı olmadan onların evlərində axtarış aparıb, Zülfüqar İbrahimovun evindən odlu silah, Vüqar Əliyevin evindən isə 2 ədəd patron “tapılıb”. Tam məsuliyyətlə Sizə bildirirəm ki, bu, qurama bir işdir, rayon səviyyəsində hansısa məmurun intriqası və qərəzindən başqa bir şey deyildir. Zülfüqar İbrahimov və Vüqar Əliyev nümunəvi, qanuna tabe olan vətəndaşlardır, heç bir qrupla əlaqələri yoxdur, heç vaxt heç bir yabançı və zərərli təbliğatla məşğul olmayıblar. Hesab edirik ki, bu yanlışlıq və ədalətsizlik dərhal aradan qaldırılmalıdır. Hansısa məmurun bu cür qərəzli hərəkəti hakimiyyətin imicinə də zərbə vurur, cəmiyyətdə, xüsusilə də cəbhəyanı ərazilərdə mənəvi-psixoloji duruma mənfi təsir göstərir”.

A.Nağı Daxili işlər naziri və Baş prokurorun məsələyə dərhal müdaxilə etmələrini xahiş edib: “Xahiş edirik ki, iki Azərbaycan vətəndaşına qarşı ədalətsizliyə imkan verməyəsiniz, haqq-ədalətin bərpa olunmasına yardım edəsiniz”.

Məsələ ilə bağlı DİN-in mətbuat xidmətinin əməkdaşı Orxan Mansurzadə ilə danışdıq. DİN əməkdaşı araşdırma aparılandan sonra rəsmi mövqe bildiriləcəyini söylədi. /musavat/
1002 dəfə baxılıb
Loading ...
Nur-Az Xeber
29.11.16, 12:22
Dollar 1,79-u keçdi
29.11.16, 09:25
Qış yuxusu