Şrift ölçüsü:
A+
A
A-
Kr
05 Dekabr 2013

Hakimiyyətdə aksiya qorxusu

İqtidar qiymət artımı ilə bağlı mitinq elanlarından narahat olub

Sürücülərdən benzinin bahalaşmasına orijinal etiraz

Milli Şura yanacağın qiymətinin bahalaşdırılmasına etiraz mitinqi keçirəcək. Qurumun sədri Cəmil Həsənli “Media forum” saytına deyib ki, mitinqin zamanı və yeri ilə bağlı müzakirələr aparılır: “Məsələni şuraya daxil olan partiyalarla birlikdə yenidən müzakirə edib mitinqin zamanı və məkanı haqda qərar verəcəyik.
Bundan sonra Bakı Şəhər Icra Hakimiyyətinə müraciət edəcəyik. Aksiya yaxın günlərdə olacaq”.
Cəmil Həsənli əlavə edib ki, insanlar nə baş verdiyini özləri üçün aydınlaşdırmalı, cəmiyyət qiymət artımının əsassız olduğunu dərk etməlidir: “Vətəndaş yanacaqdoldurma məntəqəsinə gedəndə və yanacaq üçün artıq pul ödəyəndə bahalaşmanın ağırlığını öz çiyinlərində hiss edəcək. Hesab edirəm ki, bunun üçün bir necə gün lazımdır. Bu, insanların yaşayışına, güzəranına qəsddir”.
Milli Şura sədrinin fikrincə, yanacağın qiymətinin artırılmasına ehtiyac yox idi: “Azərbaycanda benzin ABŞ-dakından bahadır. Amerika vətəndaşlarının əməkhaqqı, pensiyası, sosial müavinətləri Azərbaycanla müqayisə oluna bilməz, bizdə dəfələrlə azdır. Hakimiyyət vətəndaşlara cüzi miqdarda əməkhaqqı, pensiya verir. Bəs yanacağı niyə bu qədər bahalaşdırır? Seçkiöncəsi kampaniya kimi əməkhaqqını, pensiyanı on faiz artırdılar, amma benzini otuz faiz bahalaşdırdılar. Azərbaycan iqtisadiyyatının infrastrukturu elə qurulub ki, yanacaq qiymətləri müəyyənləşdirən əsas məhsuldur. Əgər yanacaq bahalaşdırılırsa, deməli, bütün sahələrdə qiymət artacaq.
Bəla ondadır ki, hakimiyyət benzini xaricə daha ucuz satır. Bu, hakimiyyətinin öz vətəndaşlarına sayğısızlığının göstəricisidir. Yanacağın Azərbaycan vətəndaşlarına baha, xaricə ucuz satılması məsələsi ciddi araşdırılmalıdır. Insanlar bu fərqin səbəbini bilməlidirlər. Burada böyük mənimsənilmələr var".
Bu arada sosial şəbəkələrdə məlumat yayılıb ki, Bakıda bir qrup sürücü benzinin qiymətinin qalxmasına etiraz olaraq aksiya keçirib. Aksiya “Əllər siqnala” adlanıb. Aksiyaya qoşulan sürücülər eyni vaxtda fasiləsiz siqnal verməklə benzinin bahalaşmasına etirazlarını bildirib.
Bundan başqa sosial şəbəkələrdə dekabrın 8-də Azadlıq meydanında qiymət artımına etiraz aksiyası olacağı ilə bağlı elan yayılıb.
Xatırladaq ki, benzinin bahalaşmasına ilk etiraz Lənkəranın Liman qəsəbəsində olub. Liman sakinləri dekabrın 3-də etiraza qalxıb. Polis aksiyanı dağıdıb. Lakin dünən DIN-in mətbuat xidmətinin şöbə rəisi Orxan Mansurzadə Limanda hər hansı aksiyanın olmadığını bildirib. “Polisin aksiyaya müdaxilə etməsi, hadisəni işıqlandıran jurnalistlərin saxlanılması barədə deyilənlərin heç bir əsası yoxdur”. Sakinlər isə bunun əksini söyləyir.
“Azadlıq”a daxil olan məlumatlarda bildirilir ki, hakimiyyət ölkədə sosial partlayışın olacağından çox narahatdır. Ona görə də yerlərdə aksiya ilə bağlı məlumatlar təkzib olunur.
1783 dəfə baxılıb
Loading ...
Nur-Az Xeber