Şrift ölçüsü:
A+
A
A-
Kr
27 May 2016

“MTN işi”ndə telefon qalmaqalı davam edir

Çovdarov və Quliyevin vəkili məlumatların əsassız, Müzəffər Baxışov isə həqiqət olduğunu deyir

Ləğv olunan Milli Təhlükəsizlik Nazirliyinin həbsdə olan generallarının vəkili barəsində yazılanlardan danışıb. MTN-nin hazırda həbsdə olan generalları Akif Çovdarov və Teymur Quliyevin vəkili Arif Rəsulov onlardan birinə mobil telefon vermək istəyərkən saxlanılması və barəsində cinayət işi açılması barədə musavat.com-a açıqlama verib.

Vəkil A.Rəsulov barəsində yazılanların doğru olmadığını deyib: “Cinayət işi kimin barəsində açılırsa, həmin şəxs çağırılır və ifadəsi alınır. Sonra məsuliyyətə cəlb edilməsi barədə qərar qəbul edilir və ona qarşı ittiham elan edilir. Bəs necə cinayət işi açılıb ki, mənim xəbərim yoxdur?”

Vəkil 15 gün əvvəl Bakı Istintaq Təcridxanasında olarkən üzərində mobil telefonun tapılması xəbərini təsdiqləyib. Lakin vəkil bunun səbəbini unutqanlıqla izah edib: “Həmin gün istintaq hərəkəti ilə bağlı müstəntiq tərəfindən dəvət olunmuşam. Telefon isə üstümdə olub. Bunun da səbəbi unutqanlıq olub. 20 ildir işlətdiyim nömrəmdir. Mən axmaq deyiləm ki, aparıb həmin nömrəm olan telefonu məhkuma verim. Həmin zaman mən heç məhkumu görməmişdim. Gözləyirdim ki, məhkumu gətirəcəklər”.

Xatırladaq ki, Bakı Istintaq Təcridxanasında MTN-in Monitorinq Mərkəzinin rəisi, general-mayor Teymur Quliyevlə görüş zamanı vəkil Arif Rəsulovun üzərinə baxış keçirilərkən onda mobil telefon aşkarlanması ilə bağlı məlumat yayılmışdı. Həmçinin vəkil barəsində Cinayət Məcəlləsinin 317-1.2-ci (cəzaçəkmə müəssisələrində və ya istintaq təcridxanalarında saxlanılan şəxslərə qadağan olunmuş əşyaların verilməsi və ya ötürülməsi, eyni əməllər şəxs tərəfindən öz qulluq mövqeyindən istifadə etməklə törədildikdə) maddəsi ilə cinayət işi başlandığı qeyd olunurdu.

Lakin 13 saylı hüquq məsləhətxanasının rəhbəri olan vəkil A.Rəsulov barəsində yazılanların həqiqət olmadığını deyir: “Mən hər gün həbsxanalara ayaq basıram. Uşaq deyiləm ki, cibimdə telefonla gedim. Telefonun üstümdə qalmasının səbəbini də izah etdim”.

Mətbuatda A.Rəsulovun Vəkillər Kollegiyasının sədri Azər Tağıyevin yaxın adamı olması haqda da məlumatlar yer alır. Vəkil “Mahmudov-Çovdarov” qruplaşması ilə əlaqəsinin olması haqda yazılanların da yalan olduğunu qeyd edib.

Tanınmış hüquqşünas Müzəffər Baxışov isə “Azadlıq”a açıqlamasında Arif Rəsulovun özünün yalan danışdığını deyib. Müzəffər Baxışov bildirib ki, vəkilin telefonu unudaraq təcridxanaya keçirməsi mümkün deyil: “Təcridxananın qapısında əsgərlər dayanır və onların vəkillərə ilk xəbərdarlığı telefonla bağlı olur. Digər tərəfdən Arif Rəsulov deyir ki, o həmin telefonu 20 ildir işlədir. O zaman necə olub ki, 20 il işlətdiyi telefonu unudub. Mən sizi əmin edirəm ki, o yalan danışır. Böyük ehtimalla təcridxana rəhbərliyində Arif Rəsulovla bağlı əməliyyat məlumatı olub və o, axtarış nəticəsində ifşa edilib. Bu Arif Rəsulovla bağlı birinci hal deyil.

Qeyd edim ki, Arif Rəsulov Vəkillər Kollegiyasının intizam komissiyasının sədridir, həmçinin kollegiyanın sədri Azər Tağıyevin agenti kimi tanınır. Məhz onun əlilə kollegiya üzvü ləyaqətli vəkillər ləkələnir. Mənim də kollegiyadan çıxarılmağımda onun rolu olub. Arif Rəsulov iddia edirdi ki, guya mən moderator.az saytına müsahibəmdə bir vəkil kimi Ali Məhkəmənin sədri Ramiz Rzayevi ittiham etmişəm. Lakin mən bu fikirləri müstəqil hüquqşünas kimi səsləndirmişəm və bir daha deyirəm ki, Ramiz Rzayev korrupsiya ilə məşğuldur.

Mətubatda gedən məlumatlara görə, Azər Tağıyevin ləğs olunmuş MTN-in keçmiş rəhbərliyi ilə sıcaş münasibətləri olub. Hətta indi də Eldar Mahmudovla əlaqələrinin olduğu bildirilir. Yəqin ki, onlardan gələn sifarişləri Arif Rəsulov vasitəsilə icra edirmiş. Mən Arif Rəsulov barədə 317-1.2-ci maddə ilə cinayət işi başlanmasını müstəb hal sayıram. Əminəm ki, araşdırma aparılacağı təqdirdə onun başqa cinayət xarakterli əməlləri də üzə çıxacaq.

Sonda buradan Arif Rəsulova müraciət edirəm: Arif Rəsulov, heç 40 gün keçməmiş Allah mənə qarşı etdiyin sifarişli, qərəzli hərəkətlərinin cəzasını verdi. Sən ifşa olundun. Sənin qanunsuz hərəkətlərin nə vaxtsa qarşına çıxmalıydı və çıxdı. Allah sənin cəzanı daha sərt edəcək, sən buna layiqsən”./teref/
432 dəfə baxılıb
Loading ...
Nur-Az Xeber
07.12.16, 10:54
Hətta bir yuxusuz gecə...