Şrift ölçüsü:
A+
A
A-
Kr
17 Fevral 2014

“Rəhmətlik özü gəlsin, pensiyasını verək...”

“Deyirlər ki, qanunda dəfn xərci deyilən yardım var. Getmişik rayonumuzdakı Sosial Müdafiə Fonduna, bizi araya qoyub gülürlər ki, dəfn xərci nə olan şeydir...”

Bunu “Azadlıq” radiosunun “Qaynar xətt”inə şikayət edən Neftçala sakini Vüqar Abdullayev deyir. Onun sözlərinə görə, anası Dilarə Abdullayeva 4 aydır vəfat edib. Bu müddət ərzində Neftçala Rayon Sosial Müdafiə Fondundan dəfn xərcini ala bilməyiblər.

“Halbuki biz anamıza ölüm haqqında şəhadətnamə alanda rayon qeydiyyat idarəsindən qəbz veriblər ki, gedib rayon Sosial Müdafiə Fondundan dəfn xərcini alaq” - deyə V.Abdullayev bildirir.

Vüqar Abdullayevin sözlərinə görə, təkcə dəfn xərcini yox, vəfat etmiş anasının sağlığında ala bilmədiyi təqaüdü də onlara vermirlər: “Anam ölümündən 2 ay əvvəl təqaüdə çıxmışdı, hələ təqaüdünü kartına köçürməmişdilər. Sosial Müdafiə Fondu deyir, sağlığında almayıbsa, o pullar da batıb. Bizi get-gələ salırlar”.

Vüqar Abdullayev deyir, təqaüd anasına xəstəliyi ilə əlaqədar kəsilibmiş: “Lazımi prosedurlardan keçəndən sonra sənədlərini rayon Sosial Müdafiə Fonduna təqdim etmişdi. Fonddan anama bildirdilər ki, ona təqaüd xətti açılıb. Sonra kartını bu gün-sabaha salıb gecikdirdilər. İndi də deyirlər, özü yoxdursa, verə bilmərik, təqaüd fondun büdcəsinə qayıdıb”.

Hüquqşünas Namizəd Səfərovisə məsələni belə şərh edir: “Pensiya kartı mərhuma sağlığında verilmişdi, ya yox, bunun məsələyə dəxli yoxdur. Təqaüd rəsmiləşmişdisə, rəsmiləşən gündən ölən tarixədək olan müddətin təqaüdü onun ailəsinə verilməlidir. Qanunvericilikdə sosial yardımın növlərindən biri olan dəfn xərci var. Birdəfəlik yardımdır və ailə üzvlərinə Dövlət Sosial Müdafiə Fondu tərəfindən mütləq ödənilməlidir”.
1436 dəfə baxılıb
Loading ...
Nur-Az Xeber