Şrift ölçüsü:
A+
A
A-
Kr
08 Mart 2014

Biləsuvarın icra başçısı sosial yardımı varlılara verir

“Biləsuvar rayonunda dövlət tərəfindən ayrılan sosial yardımlar yoxsul, imkansız ailələrə deyil, vəzifə sahiblərinin yaxın qohum-əqrəbalarına yazılıb onlarla yarı bölünür”.

Bu sözlər Biləsuvarın Xırmandalı kənd sakini Elşən Əsədovun mətbuata ünvanladığı müraciətdən götürülüb. O, prezidentə, əmək və əhalinin sosial müdafiəsi naziri Səlim Müslümova müraciətlə yazır:

“Üç övladım var. Mən və həyat yoldaşım işsizik. Ünvanlı sosial yardım almaq üçün dəfələrlə aidiyyəti orqanlara müraciət etsəm də hər dəfə müraciətlərimiz müxtəlif bəhanələrlə rədd edilib. Uşaqlarımın xəstə olmağını, ailəmizin acınacaqlı vəziyyətini kənd və rayon rəhbərliyi bilsə də bizə sosial yardım əvəzinə boş vəd verirlər. Vədi isə qazana atıb ac uşaqlara yedirtmək olmur.

Xırmandalı kəndində Biləsuvar Rayon İcra Hakimiyyətinin Xırmandalı kənd ərazi üzrə icra nümayəndəsinin müavini Tofiq Səyadulla oğlu Paşayev Rayon Sosial Yardım Mərkəzinin Xırmandalı kəndi üzrə işçisi Rəşad Nəsirovla işbirliyi qurublar. Bu vəzifə sahibləri sosial yardımı özlərinin lazım bildikləri yaxın adamlarının adına yazaraq dövlət vəsaitlərini talamaqla məşğuldurlar. Tofiq Paşayev qardaşına və bacısına, digər imkanlı qohum-əqrəbasına yüksək məbləğdə ünvanlı sosial yardım yazdırıb.

Ümumiyyətlə, kəndimizdə və rayonda sosial yardım imkanlı ailələrə paylanır. Bu ilin əvvəlində Əmək və Əhalinin Sosial Müdafiəsi Nazirliyinin rəhbərliyində dəyişiklik olarkən elə güman etdim ki, Biləsuvar Sosial Müdafiə Mərkəzində də haqq-ədalət bərpa olunacaq, qanunun aliliyi təmin ediləcək. Çox təəssüf ki, bu baş vermədi. Biləsuvardakı özbaşınalıqlar yeni nazirin gözündən yayındı. Paşayev Tofiqlər, Nəsirov Rəşadlar Biləsuvarda yenə də öz yazılmamış qanunları ilə işləyərək dövlət vəsaitlərini talayır, vətəndaşların konstitusion hüquq və azadlıqlarına tüpürməklə məşğuldurlar”./Müsava/
1198 dəfə baxılıb
Loading ...
Nur-Az Xeber