Шрифт өлчүсү:

26 Октјабр 2013

Əҹнәбиләрлә бағланан 300-700 мин долларлыг мүгавиләләрдәки мәбләғин 30 фаизи бу група чатыр

Дүнја футболунда ојунчуларын һесабына газ вуруб газан долдуран бир зүмрә вар. Онларын адына менеҹерләр дејилир. Инди футболда клуб рәсмиләри илә базарлығы футболчулар јох, менеҹерләр апарыр.

Мүасир футболда ојунчуларын гијмәтинин фантастик шәкилдә артырылмасында менеҹерләрин дә данылмаз “хидмәтләри” вар. Чүнки онларын чөрәји бундан чыхыр. Футболчу нә гәдәр баһа гијмәтә трансфер олунарса, менеҹер дә бир о гәдәр чох газанаҹаг.

Бекар әҹнәбиләр вә клуб рәһбәрләринин марағы...

Пешәкар менеҹерлик фәалијјәти Азәрбајҹан футболуна аид едилмәмәлидир. Чох садә сәбәбә ҝөрә - Азәрбајҹанда футболчу трансферләри һәјата кечирилмир. Јәни һансыса бир клуб диҝәр клубла мүгавиләси олан футболчуја елчи дүшмүр. Биздә јалныз азад аҝент статусунда олан футболчуларла мүгавилә бағламаға үстүнлүк верирлир.



Амма бу, о демәк дејил ки, Азәрбајҹанда футбол менеҹерлији илә мәшғул оланлар јохдур. Вар. Өзү дә онлар да кифајәт гәдәр газанҹ әлдә едирләр. Азәрбајҹанлы менеҹерләр клубсуз галан әҹнәби футболчуларла әлагә јарадыр, ону клублара тәклиф едирләр.

Азәрбајҹанда әҹнәбиләрлә мүгавилә бағланаркән онлара бир ил үчүн 300-700 мин доллар арасы пул өдәнилдијини нәзәрә алсаг, јерли менеҹерләр һеч дә пис газанмырлар. Белә ки, менеҹерләр футболчулардан мүгавиләдәки мәбләғин ән азы 30 фаизини тәләб едирләр. Белә олан тәгдирдә ән уҹуз әҹнәби футболчунун трансфериндән тәхминән 100 мин доллар ирәли дүшмәк олур.

Менеҹерләр бекар әҹнәби футболчу тапмагла јанашы клуб рәһбәрләри илә дә јахшы әлагәдә олмалыдырлар. Онларын да мараглары тәмин олунмалыдыр ки, тәклиф олунан футболчулары командаја ҝөтүрсүнләр. Мараглар тәмин олунан јердә футболчунун сәвијјәси елә дә өнәмли дејил.

Мараглар үст-үстә дүшәрсә, һәтта футбол ојнамағы јадырғамыш әҹнәби ојунчу да командаја ҝөтүрүлүр. Онун үчүн пул өдәнилир, менеҹер дә һаггыны алыр. Футбол ојнамағы јадырғамыш әҹнәби дә бир ил еһтијат ојунчулар скамјасында ҝүн кечириб Азәрбајҹаны күлли мигдарда вәсаитлә тәрк едир.

Гајдаја ҝөрә, инди Азәрбајҹан чемпионатында һәр бир команданын старт һејәтиндә 7 леҝионер мејдана чыха биләр. Тәхминән 3-4 леҝионерин дә еһтијат ојунчу кими алындығыны нәзәрә алсаг, һәр бир команда 10-11 леҝионер трансфер едир. Демәк олар ки, бүтүн командалар бу имкандан јарарланырлар. Инди Азәрбајҹанда һејәтиндә леҝионер олмајан футболчу јохдур.

Трансфер мафијасынын “хач атасы”

Ортада бөјүк пүллар варса, демәли, бу саһәдә бөјүк ојунлар, бөјүк махинасијалар да вар. Бу да Азәрбајҹан футболунда трансфер мафијасынын фомалашмасына ҝәтириб чыхарыб.

Виртуалаз.орҝ сајты Азәрбајҹанын трансфер мафијасы илә бағлы илҝинҹ мәлуматлар әлдә едиб. Өнҹә ону гејд едәк ки, Азәрбајҹан ҹәмијјәтинин бүтүн саһәләринә хас олан монополија амили футбол тәсәррүфатына да сирајәт едиб. Јәни трансфер мафијасы бир групдан ибарәтдир. Һазырда Азәрбајҹанда ҝерҹәкләшән бүтүн трансферләрин 80 фаизинә бу груп нәзарәт едир. Групун “хач атасы” исә Пешәкар Футбол Лигасынын президенти Рамин Мусајевдир. Онун групуна чох адам дахил дејил. Мусајевин јахын гоһуму олан гардашларын - Әһмәд Нәбизадә вә Полад Нәбизадәнин адамларындан ибарәт олан бу груп әҹнәби футболчуларын трансферини һәјата кечирмәклә јанашы јерли футболчуларын да кечидинә нәзарәт едир.

Р.Мусајев амили клубларын әксәријјәтини бу групла әмәкдашлыға вадар едир. Бу групла әмәкдашлыг етмәјән командалар чемпионатда даим сыхылыр, һаким һагсызлығы илә үз-үзә галыр. Менеҹерликлә мәшғул олан диҝәр шәхсләр дә бу групун һеҝемонлуғуну гәбул едибләр. Онлар әлләриндә олан футболчулары һансыса Азәрбајҹан клубуна тәклиф етмәк үчүн мүтләг Рамин Мусајевин групунун разылығыны алмалыдыр. Јәни трансфер ҝәлириндән онларын фаизи мүтләг өдәнилмәлидир.

Гејд едәк ки, футболчу трансферләри илдә ики дәфә - гышда вә јајда һәјата кечирилир. Фикир вермисинизсә, Азәрбајҹан клублары һәм гышда, һәм дә јајда хејли трансфер ҝерчәкләшдирирләр. Јајда алдыглары футболчуну гышда, гышда алдыгларыны јајда говурлар.

Бу да трансфер мафијасынын дигтәсинә бағлыдыр. Мәһз онларын тәкиди илә белә едилир ки, даһа чох чиркли вәсаит јујулсун, даһа чох пул газанылсын.

Арашдырмалар нәтиҹәсиндә үзә чыхардығымыз факт будур ки, бир ил әрзиндә Азәрбајҹанын трансфер базарында менеҹерләрин ҝәлири 5 милјон доллардан јухары олур. Бу вәсаитин 4 милјон доллары Рамин Мусајевин групунун нәзарәтинә кечир.

Бу групла әмәкдашлыг етмәјән командаларын сыхышдырылдығыны гејд етдик. Азәрбајҹан футболунда Мусајевин һимајә етдији групла әмәкдашлыг етмәјән командалардан бири дә “Хәзәр Ләнкәран”дыр. Әвәзиндә бу команда даим һаким сәһвләриндән әзијјәт чәкир. Санбаллы бүдҹәјә вә әла инфраструктура саһиб олмасына рәғмән уғур әлдә едә билмир. Сәбәб ајдындыр: Азәрбајҹан футболунда уғур мејданда јох, АФФА-нын диварлары арасында әлдә едилир.

10 иллик јубилејиндә гаршысына чемпионлуг мәгсәди гојан, үнлү Ҹон Тошакы баш мәшгчи постуна ҝәтирән “ағ-јашыллар” һазырда турнир ҹәдвәлинин ашағы пилләсиндә гәрарлашыб. Бу, трансфер мафијасына бојун әјмәмәјин нәтиҹәсидир.

Буна бариз бир нүмунә дејәк. Мирча Редник “Хәзәр Ләнкәран”а ҝәләркән өзү илә олдугҹа сәвијјәли леҝионерләр ҝәтирмишди. Румын чалышдырыҹы елә бир команда формалашдырмышды ки, онун гаршысыны һаким сәһвләри илә дә алмаг олмурду. Белә мәгамда Рамин Мусајевин групу һәмин футболчулары ширникләндирҹи вәдләрлә јолдан чыхарды. Онлара “Хәзәр Ләнкәран”да алдыгларындан ики гат артыг пул тәклиф едилди. Нәтиҹә нә олду? Уинстон Паркс “Бакы”ја, Жулиус Вобај “Нефтчи”јә трансфер олунду. Беләҹә, Редникин формалашдырдығы мөһтәшәм “Хәзәр Ләнкәран” чөкдүрүлдү.

Дејиләнләрә ҝөрә, Рамин Мусајев ҹәнуб клубунун рәһбәрлијнә “бизим трансфер сијасәтимизи гәбул един, уғур тәмин олунсун” месажыны да ҝөндәриб.

АФФА президенти Рөвнәг Абдуллајевдән һәр ҹүр дәстәк алан Рамин Мусајев Азәрбајҹан футболунда трансфер мафијасы-монополија јарадыб. Клублар һәлә ки, бу мафија гаршысында дуруш ҝәтирә билмирләр. Ја онларын һөкмранлығыны гәбул етмәлисән, ја да күлли мигдарда хәрҹләнән вәсаитә рәғмән турнир ҹәдвәлинин “зирзәмиси”ндә гәрарлашмалысан. Тәзјиг үчүн дә һәр ҹүр рычаг вар...