İçərişəhər “Cümə” məscidinin dini icması və DEVAMM “Qarabağı və Qüdsü unutma!” mövzusunda konfrans keçirdi
Mübarək Ramazan ayının son cümə günü bütün dünyada Beynəlxalq Qüds Günü kimi qeyd edilir. Bu, işğal olunmuş ərazilərlə həmrəylik simvolu olaraq keçirilən, məzluma dəstək, zalıma etiraz səciyyəsi daşıyan bir tarixdir.
Azərbaycanımızda da bu tarixin qeyd edilməsi – artıq ictimaiyyətdə oturuşmuş bir ənənə xarakteri alıb. Erməni faşistlərinin tapdağı altında Qarabağı inləyən bir millətə, sionizmin onminlərlə qurban hesabına zəbt etdiyi, bütün dünya müsəlmanlarının and yeri, ilk qibləsi olan Qüdslə bağlı hisslər çox tanışdır.
İçərişəhər “Cümə” məscidinin dini icması və DEVAMM (Dini Etiqad və Vicdan Azadlıqları Müdafiə Mərkəzi) bu münasibətlə “Qarabağı və Qüdsü unutma!” mövzusunda konfrans keçirmişdir. Ənənəvi olaraq, tədbir Qurani-Kərimin tilavəti və Dövlət Himninin cəmlə oxunması ilə başlandı.
Daha sonra tədbiri giriş sözü ilə açan DEVAMM (Dini Etiqad və Vicdan Azadlıqları Müdafiə Mərkəzi) sədrİ, ilahiyyatçı-filosof Hacı İlqar İbrahimoğlu Qüds gününün bir sıra xüsusiyyətlərinə toxunub:
“Önəmli bir tarixi günü yaşayırıq. Qədr gecələrinin əhəmiyyətini hər kəs bilir. Qüds gününü anlamaq üçün bu vurğunu etmək lazımdır ki, Qüds günü Ramazan ayının son Cümə günü elan olunmaqla burada xüsusi vurğular var. Mübarək ayın içərisində Ramazan ayının son Cümə günündə ümmətlə bağlı təqva dərsi də keçilir. Qüds günü böyük bir təqva günüdür.
Üç əhyadan sonra bu günün təyin edilməsi ilə sanki əziz imanlıya xüsusi mesaj var, necə ki, bu üç əhya gecələrində oyanış yaşayıb, eləcə də ibadətin, ictimai-siyasi oyanışın əhyasını yaşayır. Burada bir ictimai-siyasi oyanış baş verir.
Qüds günü bir İslam günüdür. İslam günü, yəni Tövhid günüdür. Qüds günü “La İlahə illəllah” deyərək bütlərin dağıdıldığı gündür. Qüds günü – böyük bir bütün – sionizmin dağıdıldığı bir gündür. Xoş olsun iman əhlinin halına ki, bu tövhidpərəstlik ruhiyyəsini yaşadırlar.
Qüds günü – bir coğrafi anlayış deyil. Bu gün konkret bir coğrafiyaya aid olan məsələ deyil. Hər yerdə ki, işğal var, insanlar zülmə məruz qalır, torpaqları işğal olur, orada Qüds günü yaşanmalıdır. Bu anlamda bizim üçün Qüds günü daha doğmadır. Qüds günü – Ağdam, Şuşa günüdür. Qüds günü – bütün işğal edilmiş torpaqlarımızın, zülmə məruz qalmış, şəhid edilmiş insanlarımızın günüdür. Qüds günü Bəhreyn, İraq, Suriya, Yəmən günüdür. Qüds günü – haqla batilin ayrıldığı, haqla batilin cəbhələrinin müəyyən olunduğu gündür”.
Daha sonra çıxış edən Rüfət Əliyev Qarabağ münaqişəsinin tarixçəsi, Qarabağda baş verənlər, Qüds ilə Qarabağ arasında paralellər mövzusunda çıxış edib.
Növbəti çıxışçı Ülviyyə Bədəl Fələstin – dünən, bu gün və sabah mövzusunda geniş məruzə ilə çıxış edib
Digər çıxış edən məruzəçi Mətləb Həmzə Aprel döyüşlərindən sonra xalqımızın bir daha üzə çıxan döyüş ruhiyyəsi və torpaqları azad etmə əzmi barədə danışıb.
Növbəti çıxış edən Asif Əzizov Qüds günü – dünyada məzlumların günü mövzusunda çıxış edərək, Bəhreyn, Yəmən, İraq, Suriyada baş verənlərdən danışıb.
Digər çıxış edən Xəyalə Quliyeva da Qüds günü ilə Qarabağ arasında paralellər apararaq ölkəmizdə günbəgün mənəvi yüksəlişin, işğala etiraz ruhiyyəsinin yüksəlməsi barədə danışıb.
Növbəti çıxışçı Kazım Əlibeyli son dövrlərin bəlası olan İŞİD terroru və bu terrorun genişlənməsində sionizmin rolundan danışıb.
Digər çıxışçı İlham Mehdiyev Qüds günü – dostu və düşməni tanıma günü mövzusunda çıxış edib.
Sonda çıxış edən DEVAMM (Dini Etiqad və Vicdan Azadlıqları Müdafiə Mərkəzi) sədri Hacı İlqar İbrahimoğlu bu günün yaşadılmasının önəminə vurğu edib və bu günü yaşadan hər bir kəsə minnətdarlıq edib.
Tədbir duaların edilməsi və “Fərəc” duasının oxunması ilə yekunlaşıb./Deyerler/
