Bu gün Xanım Fatimeyi-Zəhranın (s.ə) mübarək mövlud günüdür

Həzrəti Fatimeyi-Zəhranın (s.ə) mübarək mövludu günü münasibəti ilə bütün müsəlmanları təbrik edirik

Həzrəti Məhəmməd (s) buyurur: Ey Fatimə! Hər kəs sənə salavat göndərsə Allah onu bağışlayar və cənnətin harasında olsam belə onu mənimlə bərabər edər.

Xanım Fatimə (s.ə) besətin 5-ci ilində qəməri təqvimi ilə cəmadius-sani ayının 20-i dünyaya gəlib. Dünya və axirət xanımlarının seyyidəsi, Həzrət Rəsulullahın (s) gözünün işığı xanım Fatimeyi-Zəhranın (s.ə.) mübarək mövlud günü Xanımlar günü kimi də qeyd edilir.

Fatimeyi-Zəhranın(s.ə.) dünyaya gəldiyi gün – İslam aləmində ən əzəmətli günlərdən biri hesab edilir. Bu günün müqəddəsliyinə dəlil olaraq Allah Təala Rəsuli-Əkrəmə (s) müjdə verir, bu münasibətlə Qurani-Kərimin «Kövsər» surəsini nazil edir.

Həzrət Fatimədən (ə) 10 hədis

1. Həzrət Fatimə (ə) buyurub: “Sizin ən yaxşınız insanlarla mülayim və mehriban davranan, ən dəyərliniz isə xanımına qarşı mehriban və güzəştli olanınızdır.” (“Nəhc əl-həyat”, səh. 168)
2. Həzrət Fatimə (ə) buyurub: “Məhəmməd və Əli bu ümmətin atalarıdır. Əgər ümmət bu iki nəfərə itaət etsə, onları zəlalət və həmişəlik əzabdan qoruyacaqlar. Əgər onlarla müvafiq olsalar, əbədi nemətə qovuşduracaqlar.” (“Müstədrək əl-vəsail”, c. 12, səh. 262)
3. Həzrət Fatimə (ə) buyurub: “Ananın xidmətində dayan. Çünki cənnət ananın ayaqları altındadır.” (“Nəhc əl-həyat”, səh. 322)
4. Həzrət Fatimə (ə) buyurub: “And olsun Allaha ki, “axirət səfərinə nə hazırlamışam?” düşünməklə, mənim qəm-qüssəm artmış, yoxsulluğum ağırlaşmış və təəssüfüm uzun-uzadı olmuşdur.” (“Nəhc əl-həyat”, səh. 80)
5. Həzrət Fatimə (ə) buyurub: “Hədid, Vaqiə və Rəhman surələrini oxuyan şəxs həm göydə, həm də yerdə cənnət əhli kimi tanınır.” (“Nəhc əl-həyat”, səh. 280)
6. Həzrət Fatimə (ə) İmam Əliyə (ə) dedi: “Ey Əbul-Həsən! Mən öz Rəbbimdən həya edirəm ki, səndən yerinə yetirməyə gücün çatmayacağı bir şeyi istəyəm.” (“Bihar əl-ənvar”, c. 38, səh. 103; “Nəhc əl-həyat”, səh. 17)
7. Həzrət Fatimə (ə) atasına dedi: “Ey Allahın Rəsulu! Qadınlar izdivac edərkən dirhəmləri (mal) öz mehriyyələri edirlər. Bəs, mənimlə onların arasında nə fərq olar? Səndən istəyirəm ki, mənim mehriyyəmi mal qərar verməyəsən və Allahdan istəyəsən ki, mənim mehriyyəm Sənin ümmətinin günahkarlarına şəfaət etmək ixtiyarı olsun”. (“Fatimənin (ə) kəlamlarının ensiklopediyası”, səh. 278)
8. Həzrət Fatimə (ə) buyurub: “Allahın rəsulu (s) buyurdu: Hər kəs qızım Fatiməni sevsə məni sevib və hər kəs Fatiməni razı etsə məni razı edibdir.” (“Nəhc əl-həyat”, səh. 289)
9. Həzrət Fatimə (ə) dedi: “Atacan, məhşər gününü və camaatın o gün çılpaq dayanacaqları günü xatırladım. Vay, o gün Uca Allah qarşısında pis əməllərdən.” (“Nəhc əl-həyat”, səh. 282)
10. Həzrət Fatimə (ə) buyurub: “Allah sileyi-rəhimi (qohumlarla əlaqə saxlamağı) ömrünüzün uzun olması və sayınızın artması üçün səbəb qərar vermişdir.” (“Ehticac”, c. 1, səh. 97)