Rəcəb ayı və onun birinci gecəsi insanı ildırım sürətilə siratdan keçirən namaz

Rəcəb ayı çox şərafətli bir aydır. Bunun bir neçə səbəbi vardır:

1. Hörməti saxlanılması vacib olan aylardandır.
2. Dua etmək üçün uyğun vaxtlardan sayılır, hətta cahiliyyət dövründə də bu məsələ məşhur olub və camaat o dövrdə dua etmək üçün Rəcəb ayının gəlişini gözləyirdi.
3. Rəcəb ayı Əmirəlmöminin Əlinin (ə) ayıdır. Necə ki, rəvayətlərə görə, Şəban Peyğəmbərin (s) və Ramazan Mütəal Allahın ayı sayılmışdır.
4. Rəcəb ayının birinci gecəsi oyaq qalaraq ibadət edilməsi üçün təkid olunmuş dörd gecədən biridir.
5. Bu ayın ortasındakı gün barədə gəlmişdir ki, həmin gün Allahın yanında ən sevimli gündür və “İstiftah” əməlinin vaxtıdır.
6. Bu ayın iyirmi yeddinci günü Rəsuli-əkrəmin (s) məbəs günüdür. Həmin gün Allahın rəhmətinin zühur etdiyi gündür. Elə bir rəhmət ki, xilqətin əvvəlindən indiyə kimi onun misli görünməmişdir.
Bunlar Rəcəb ayının fəzilətlərinin az bir hissəsidir və biz bu şərəfli ayın bütün fəzilətlərini dərk etməyə qadir deyilik.

Rəcəb ayının birinci gecəsinə aid namaz

“İqbal”da “Rəvzətul-abidin” kitabından bu gecəyə aid namazlar nəql olunmuşdur. Özüm kimi zəif kəslər üçün onlardan ən asan olanını qeyd edirəm.
Allahın Rəsulundan (s) rəvayət olunub ki, həzrət buyurdu: “Hər kim Rəcəb ayının birinci gecəsi məğrib namazından sonra iyirmi rəkət namaz qılsa və hər rəkətdə “Həmd”dən sonra bir dəfə “İxlas” surəsini oxusa və hər iki rəkətdən sonra salam oxusa, bu namazın savabını bilirsinizmi?” Səhabələr dedilər: “Allahın Rəsulu (s) bilir.” Peyğəmbər (s) buyurdu: “Ruhul-əmin bu namazı mənə öyrətdi.” Sonra həzrət qollarını çırmalayıb buyurdu: “Hər kim bu namazı qılsa, özü, ailəsi, malı və övladları amanda qalar, qəbr əzabından aman verilər, siratdan hesab-kitabsız və ildırım kimi keçər.”

Bu kitabda daha asan bir namaz nəql olunuşdur.
Allahın Rəsulu (s) buyurdu: “Hər kim Rəcəb ayının birinci gecəsi işa namazından sonra iki rəkət namaz qılsa və onun birinci rəkətində “Həmd”dən sonra bir dəfə “Ələm nəşrəh", üç dəfə “İxlas” surəsini oxusa, ikinci rəkətdə “Həmd”dən sonra “Ələm nəşrəh”, “İxlas” və “Muəzzətəyn” -yəni “Nas” və “Fələq” surələrinin hər birini bir dəfə oxusa, namazın salamını verdikdən sonra otuz dəfə “La ilahə illəllah” və otuz dəfə “Əllahummə səlli əla Muhəmmədin və ali Muhəmməd” desə, onun keçmiş günahları bağışlanar, anadan təzə doğuluş gün kimi günahlardan təmizlənər.

“İqbal” kitabında Hələvaninin “Ət-Tuhfəh” kitabından bu ayın bütün gecələri üçün namaz nəql olunmuşdur. Allahın Rəsulu (s) buyurdu: “Hər kim Rəcəb ayında hər gecə iki rəkət olmaqla 60 rəkət namaz qılsa; onun hər rəkətində “Həmd”dən sonra üç dəfə “Qul ya əyyuhəl-kafirun”, üç dəfə “Qul huvəllah” surələrini oxusa, namazın salamından sonra əllərini qaldırıb desə:

«لاَ إِلَهَ إِلاَّ اللَّهُ وَحْدَهُ لاَ شَرِيكَ لَهُ لَهُ الْمُلْكُ وَ لَهُ الْحَمْددُ يُحْيِي وَ يُمِيتُ وَ هُوَ حَيٌّ لاَ يَمُوتُ بِيَدِهِ الْخَيْرُ وَ هُوَ عَلَى كُلِّ شَيْ‏ءٍ قَدِيرٌ وَ إِلَيْهِ الْمَصِيرُ وَ لاَ حَوْلَ وَ لاَ قُوَّةَ إِلاَّ بِاللَّهِ الْعَلِيِّ الْعَظِيمِ‏ اللَّهُمَّ صَلِّ عَلَى مُحَمَّدٍ النَّبِيِّ الْأُمِّيِّ وَ آلِهِهِ‏»

“La ilahə illəllahu vəhdəhu la şərikə ləh. Ləhul-mulku və ləhul-həmdu yuhyi və yumitu və huvə həyyun la yəmutu biyədihil-xəyru və huvə əla kulli şəyin qədirun və iləyhil-məsir. Və la hövlə və la quvvətə illa billahil-əliyyil-əzim. Əllahummə səlli əla Muhəmmədin ən-nəbiyyil-ummiyyi və alih”
Sonra əllərini üzünə çəksə, Subhan Allah onun dualarını qəbul edər, altmış həcc və altmış ümrənin savanıbı ona verər.”

“Əl-Muraqibat” kitabından