Шрифт өлчүсү:

23 Јанвар 2017

Јахуд, ҹаван өлкә неҹә гоҹалыр?

Авторитар режимләр тәкҹә мадди сәрвәтләри талан етмәклә мәшғул олмур, һәм дә мәнәви сәрвәтләрә “од” вурур. Нәтиҹәдә тәфәккүр хәстәләнир, нормал дүшүнҹә гејбә чәкилир вә көләлик дамҹылары руһа һопмаға башлајыр.
Бу мәнада өлкәмиздә вәзијјәт даһа аҹынаҹаглыдыр. Узун илләрди һәгигәт ҝаһ бәһанәләрлә, ҝаһ да јаланчы аргументләрлә шәрләниб. Хүсусән дә һаггы демәјә ҹәсарәти чатмајанлар, шәрин зүлмүнә “дур” демәји баҹармајанлар мүстәгиллији шәрләјибләр. Бәли, һөкумәтин вердији тезисләри гәбул едиб, ҹәмијјәтә “брак” информасија пајлајыблар.
Ҹәмијјәтдәки чатышмазлыглардан, әдаләтсизликләрдән, таланчылыглардан данышанда дәрһал “ағыллы” адамлар пејда олур вә “мүстәгиллијимизи јени әлдә етмишик, һөкумәтдән чох шеј тәләб етмәк олмаз” нәсиһәти верирләр.
Ҝуја, бүтүн проблемләрин сәбәби мүстәгиллијимизин јашынын аз олмасыдыр. Әввәла, јахын тарихимиздә гыса мүддәт әрзиндә бөјүк ишләр ҝөрүлмәсинин јүзләрлә нүмунәси вар. Тәкҹә гоншу Ҝүрҹүстана нәзәр салмаг кифајәт едир ки, 23 иллик һакимијјәт дөврүндә бөјүк дәјишикликләрә наил олмағын мүмкүнлүјүнә инанаг. Амма башга өлкәләрин нүмунәләринә баш вурмаг нијјәтиндә дејиләм. Өз өлкәмизин нүмуләри “мүстәгиллијимиз ҝәнҹдир” аргументинин әсассызлығыны ҝөстәрмәјә кифајәт едир.
Неҹә олур ки, 23 ил әрзиндә коррупсијаны чичәкләндирмәк, монополијалар јаратмаг, милјардерә чеврилмәк, өлкәни ата малы кими бөлүшдүрмәк олур, амма вәтәндаша әл тутмаг, әдаләт јаратмаг, дөвләт әмлакыны горумаг олмур?
Биз һөкумәтдән Јупитердә стансија тикмәји, робот јаратмағы, учан автомобил истеһсалына башламағы тәләб етмирик. Биз һөкумәтдән о шејләри тәләб едирик, онлар һәлли үчүн 2-3 ај да кифајәт едәр. Вәтәндашы севмәк, әдаләтли мәһкәмә системи гурмаг, шәрләнәрәк һәбс едилмиш адамлары азадлыға бурахмаг, монополијлары ләғв етмәк үчүн узун илләр лазымдыр? Демәли, бир мәмурун милјардерә чеврилмәси үчүн 23 ил бәс едир, амма бир мәмурун шәрәфлә вәзифәсини иҹра етмәси үчүн мүстәгилик гоҹа олмалыдыр?
Ҝөрүндүјү кими һөкумәт бүтүн јарытмазлыгларыны мүстәгиллијин јашынын азлығы илә әлагәләндирмәјә чалышыр вә ҹәмијјәтдә дә бу тәблиғаты апарыр.
Əн дәһшәтлиси исә будур ки, өтән мүддәт әрзиндә ирәли ҝетмәк әвәзинә, ҝеријә аддымламышыг. Әҝәр узун илләр әрзиндә һөкумәт һансыса јол гәт етмиш олсајды вә бу тенденсија һисс олунсајды, “аста-аста дүзәләҹәк” гәнатәниә ҝәлмәк оларды. Реаллыг исә ону ҝөстәрир ки, һәр өтән ил оғурлуг, әдаләтсизлик, сахтакарлыг даһа да шахәләниб. 23 ил әрзиндә 140 милјард доллар нефт пулуну мәнимсәмәјә бәс едибсә, бу мүддәт әрзиндә һәмин вәсаити реал ишләрә сәрф етмәк дә оларды.
Там әминликлә демәк олар ки, Азәрбајҹаны ҹәннәтә чевирмәк үчүн 23 ил кифајәт едәрди. Амма бу илләр әрзиндә Азәрбајҹаны ҹәһәннәмә чевримәк үчүн ҝүҹләндирилмиш иш режиминә кечдиләр. Мүстәгиллијин вердији имканлардан мүстәгиллији гоҹалтмаг үчүн истифадә етдиләр. Бәли, ҝәнҹ мүстәгиллији әлдән салмаг, јараламаг, хәсәтләндирмәк, гоҹалтмаг үчүн нә лазымдырса етдиләр. Инди дә бүтүн писликләри мүстәгиллијин јашынын үстүнә атырлар.
Заман исә ҝөстәрди ки, башлар шејтанын әлиндә оланда јашын һеч бир фәрги олмур.