Шрифт өлчүсү:
А+
А
А-
04 Октјабр 2013

“Немәт билдирди ки, тәзјигләр даһа ҹидди формада давам едир”

Гобустан һәбсханасында ҹәза чәкән сијасәтчи Немәт Пәнаһлынын һәјат јолдашы Һәҹәр Пәнаһлы октјабрын 4-дә “Медиа форум” сајтына ачыглама вериб.

О дејиб ки, октјабрын 3-дә Немәт Пәнаһлы илә телефон әлагәси сахлајыб: “Немәт билдирди ки, һәбсханада она тәзјигләр даһа ҹидди формада давам едир. Онунла бир камераја салдыглары дустаг Немәтин үстүнә гајнар су төкүб. Камерада дава дүшүб, һәбсхана ишчиләриндән исә һеч ким буна реаксија вермәјиб. Јаландан ҝәлиб Немәтә төһмәт јазыблар ки, ҝуја гајдалары позур. Немәтдә шәкәр хәстәлији вар. Ики ҝүндүр она шәкәрә гаршы дәрманы да вермирләр. Немәт һәбсханадакы “Гајнар хәтт”ә чыхмаг үчүн дәфәләрлә рәисә мүраҹиәт едиб, амма она өз вәзијјәти һагда мәлуматы “Гајнар хәтт” васитәсилә чатдырмаға имкан јарадылмајыб. Немәт Омбудсман Апаратынын, Ишҝәнҹәләрә Гаршы Азәрбајҹан Комитәсиндән нүмајәндәнин онунла ҝөрүшмәсини тәләб едир.

Пенитенсиар Хидмәт вәкилә мәктуб вермир ки, Немәтлә ҝөрүшә билсин. Хидмәтин рәиси Мәдәт Гулијевә мүраҹиәт едирәм ки, һәбсханаларда јарадылан “Гајнар хәтт”дән Немәт Пәнаһлынын истифадә етмәсинә иҹазә верилмәдијини билсин. Үстәлик, буну тәләб етдији үчүн она төһмәт верирләр”.

Камера јолдашынын Немәт Пәнаһлыја тәзјигләр етдијини, бунун исә ҝүндәлик дава-шаваја ҝәтирдијини мәһбусун јахынлары өтән ајдан бәјан едирләр. Онлар ја Немәт Пәнаһлынын, ја да о бири дустағын башга камераја кечирилмәсин истәјирләр. Пенитенсиар Хидмәтин иҹтимаијјәтлә әлагәләр шөбәсинин рәиси Меһман Садыгов сентјабрын 30-да “Медиа форум” сајтына дејиб ки, әҝәр доғрудан да мәһкумун сағламлығына, һәјатына, јахуд тәһлүкәсизлијинә зијан ҝәләрсә, мүәссисә рәиси дустағын камерасыны дәјишдирә биләр: “Бу, мүәссисә рәисинин там сәлаһијјәтиндәдир”.

30 сентјабр ачыгламасында Меһман Садыгов ону да билдириб ки, Немәт Пәнаһлынын јахынларынын иддиасыны Гобустан һәбсханасынын рәиси Шаһин Османовла ајдынлашдырыб: “Немәт Пәнаһлыны һеч ким тәхрибата чәкмир, һеч кимин онунла конфликти дә јохдур, раһат отуруб. Тәк Немәт Пәнаһлы јох, бүтүн мәһкумлар нәзарәт алтындадыр. Гәтијјән елә бир шеј јохдур”.

Октјабрын 4-дә Һәҹәр Пәнаһлы “Медиа форум”а дејиб: “Әҝәр һеч бир проблем јохдурса, нијә вәкилини Немәт Пәнаһлы илә ҝөрүшә бурахмырлар? Һеч бир шеј јохдурса, нијә Немәтә төһмәт верирләр? Нијә гојмурлар о, “Гајнар хәтт”ә чыхсын?”

Немәт Пәнаһлы 2011-ҹи ил јанварын 8-дә тутулуб, хулиганлыг вә гәсдән сағламлыға аз ағыр зәрәр вурма иттиһамы илә 6 ил мүддәтинә азадлыгдан мәһрум едилиб.


6790 дәфә бахылыб
Лоадинҝ ...
Nur-Az Xeber
Go to TOP