Шрифт өлчүсү:
А+
А
А-
12 Мај 2022

Ислам Пејғәмбәринин (с) ҝәнҹ нүмајәндәси – Мүсәб

Ислам Пејғәмбәри (с) баҹарыглы ҝәнҹләрә чох өнәм вермиш вә онлары даим ирәли чәкмишдир. Онлар арасында тәмсилчи кими диҝәр өлкәјә ҝөндәрилән, вали вә сәркәрдә тәјин едиләнләр дә вардыр. Онлардан бир нүмунәјә диггәт јетирәк:

Мүсәб бин Үмәјрә

Ислам Пејғәмбәри (с) Мәдинә шәһәринә һиҹрәт етмәздән әввәл, Әсәд бин Зүрарә вә Зәкван Әбд Гејс адлы ики нәфәр Мәккә шәһәринә ҝәлдиләр. Онлар чох чәтинликлә Пејғәмбәрин (с) зијарәтинә наил олдулар. Пејғәмбәрин (с) тәсирли сөһбәтләрини динләдикдән сонра Ислам динини гәбул етдиләр.

Онлар Пејғәмбәрә (с) дедиләр: - Еј Аллаһын Рәсулу! Бизимлә бир адам ҝөндәр ки, бизә һәм Гуран охумағы өјрәтсин, һәм дә ҹамааты сәнин дининә дәвәт етсин. ("Бәһарүл-әнвар", ҹ. 19, сәһ. 10)

Илк дәфә иди ки, Мәдинә кими әһалиси чох вә галмагаллы бир шәһәр, Пејғәмбәрдән (с) нүмајәндә истәјирди вә биринҹи дәфә иди ки, о һәзрәт Мәккәдән башга бир шәһәрә Исламы танытдырмаг үчүн рәсми нүмајәндә ҝөндәрмәли иди. Бу иш үчүн елә адам сечилмәлијди ки, һәр ҹәһәтдән баҹарыглы вә лајигли олсун.

Пејғәмбәр (с) мүсәлманларын ичәрисиндән Мүсәб бин Үмәјр адлы ҹаваны өз нүмајәндәси олараг сечди.

Аллаһын Рәсулу (с) Мүсәб бин Үмәјрә ҝөстәриш верди ки, Әсәдлә Мәдинәјә ҝетсин. Мүсәб чох ҝәнҹ олмағына бахмајараг ҝөзәл Гуран охујан вә Гураны әзбәр билән шәхс иди. Гурандан чох шеј билирди. ("Бәһарүл-әнвар", ҹ. 19, сәһ. 10)

Бу иманлы, тәдбирли вә ағыллы ҹаван, өз ишинин өһдәсиндән јахшы ҝәлди. Чох кечмәди ки, Мәдинәнин бүтүн тәбәгәләри, хүсусилә дә ҝәнҹләри онун дәвәтини гәбул едәрәк мүсәлман олдулар. Мүсәбин имамәти илә Мәдинәдә илк ҹүмә намазы гылынды. Онун һаггында белә дејилир ки: "Мүсәб, Мәдинәдә ҹүмә намазыны илк тәшкил едән адам иди. Үсәјд бин Һүзәјр вә Сәәд бин Муаз, онун васитәси илә мүсәлман олдулар. О, бу ишләрә ҝөрә Исламын фәхри һесаб едилир." ("Усдүл-ғабә" , ҹ. 5, сәһ. 176, һәдис 4936)

Һәмчинин онун һаггында рәвајәтдә ҝәлиб: "Мүсәб бин Үмәјр Әсәд бин Зүрарәнин торпағына ҝәлиб чатды. Һәр ҝүн евдән чыхыб ҝедәрәк Хәзрәҹ гөвмү илә үнсијјәт гурурду. Онлара Ислам дини һаггында мәлумат верирди. Ҹаванлар да онун сөзләрини сәмимијјәтлә гәбул едирдиләр. ("Бәһарүл-әнвар", ҹ. 19, сәһ. 10)


1489 дәфә бахылыб
Лоадинҝ ...
Nur-Az Xeber
02.08.22, 09:32
Ҹәннәт бејәти
Go to TOP