Шрифт өлчүсү:

07 Феврал 2014

Ҹәмил Һәсәнлидән Әлијевин иттиһамларына сәрт ҹаваб

«Рәзил олмаг сәрҝәрдан халгдан мәнимсәнилмиш вәсаит һесабына Дубајда виллалар алмагдыр»

«Мүһарибә газисинин өзүнү јандырдығы бир мәмләкәтинин башчысынын јекә-јекә данышмаға һаггы јохдур»

И.Әлијев февралын 5-дә реҝионларынын сосиал-игтисади инкишафы дөвләт програмларынын иҹрасына һәср олунмуш конфрансда чыхышы заманы мүхалифәтин үнванына бир сыра иттиһамлар сәсләндириб. Сон президент сечкисинин мүхалифәтин сону олдуғуну дејән И.Әлијев демократик дүшәрҝәни хариҹи гүввәләрә ишләмәкдә иттиһам едиб: «Бизим дахили вәзијјәтимиз чох сабитдир. Сабитлик горунур. Сабитлији горујан әсас шәртләр халгла игтидар арасындакы бирликдир, халгын ҝөрдүјүмүз ишләрә дәстәјидир, инамыдыр. Будур сабитлији шәртләндирән әсас амил. Дахили вәзијјәт сабитдир. Хариҹдән олан бәзи тәзјигләр ҝөрүрсүнүз ки, һеч бир сәмәрә вермир. Бәзи сатылмыш мүхалифәт групларынын фәалијјәти һеч бир сәмәрә вермир. Бизим ајағымыза долашмаг истәјәнләр јенә дә рәзил олурлар. Сон президент сечкиләри дә буну ҝөстәрди. Халгын бөјүк әксәријјәти онларын чиркин кампанијасына ујмады. Халг реаллыға, инандығы адама сәс верди. Она ҝөрә, хариҹдән ианә алан, виҹданыны хариҹиләрә сатан үнсүрләрә Азәрбајҹан сијасәтиндә јер јохдур. Буну сон сечкиләр дә ҝөстәрди. Сон сечкиләр мүхалифәтин сону иди. Бу, онларын рәзаләт зирвәси иди”.

И.Әлијевин сәсләндирдији фикирләрлә бағлы Милли Шуранын сәдри Ҹәмил Һәсәнлинин мүнасибәтини өјрәндик. Ҹ.Һәсәнлинин И.Әлијевә вердији ҹавабы тәгдим едирик: «Илһам Әлијев дәфәләрлә мүхалифәтин сонунун анонсуну вериб. Лакин бунлардан һеч бири дүз чыхмајыб. Инди исә онун өзүнүн сону јахынлашыр. Өтән илин декабрындан башлајараг 30-35 ҝүн әрзиндә онун рәһбәрлик етдији өлкәдә 26 вәтәндаш өзүнү јандырмаға чәһд едиб вә бунун 6-сы өлүмлә нәтиҹәләниб. О, әдаләтсизликлә үзләшән вәтәндашларымызын өзүнә од вуруб јандырмасына мүнасибәт билдирсәјди даһа јахшы оларды. Мүһарибә газисинин өзүнү јандырдығы бир мәмләкәтинин башчысынын јекә-јекә данышмаға һаггы јохдур. Илһам Әлијев рус дилли олдуғу үчүн ҝөрүнүр рәзаләт сөзүнүн мәнасыны о гәдәр дә јахшы билмир. Милләтин ҝөзүндә рәзил олмаг сәрҝәрдан бир халгдан мәнимсәнилмиш вәсаит һесабына Дубајда азјашлы өвладына 75 милјон долларлыг виллалар алмагдыр. О рәзаләтин нәдән ибарәт олдуғу Виржин адаларында ашкарланан сәрвәтләрдән бәлли олду. Ән бөјүк рәзаләт өзүнү халгын “президенти” һесаб едән бир шәхсин өлкәнин ҝәлирли саһәләрини, мәсәлән, Човдар гызыл мәдәнләрини, телефон кампанијаларыны, нәглијјат , банк вә саир саһәләри өз јахын адамларынын адларына кечирмәсидир. Ән бөјүк рәзаләт өлкә ганунвериҹи органында депутат мандатларынын пулла сатылмасыдыр ки, ики илә јахындыр бүтүн дүнја Илһам Әлијев һакимијјәтинин бу рәзаләти һаггында данышыр, ән мөтәбәр һесабатларда бу барәдә јазылыр. 2013-ҹү илин президент сечкиләринә ҝәлдикдә һәмин сечкиләрдә рәзил олан мүхалифәт јох, Илһам Әлијевин билаваситә өзү иди. Сечки сәнәдләриндә ҝәлирләри вә мүлкијјәти һаггында бәјаннамәни Азәрбајҹан халгындан ҝизли сахлајан мүхалифәт јох, билаваситә Илһам Әлијев иди. Ән бөјүк рәзаләт Азәрбајҹандакы сечкиләрин сечки ҝүнүндән бир ҝүн әввәл ашкарланмасы вә дүнјанын сатирик програмларынын ҝүндәминә дүшмәси, өлкәнин бејнәлхалг аләмдә рүсвај едилмәси иди. Бүтүн бу рүсвајчылыглардан сонра ајры јерләрдә рәзаләт ахтармағын өзү рәзилликдир. Өлкәни ашағылајыб онун халгындан вә бејнәлхалг иҹтимаијјәтдән ҝизлин тәләм-тәләсик аилә инагурасијасы кечирмәк иди рәзаләт. Өтән президент сечкиләриндә Илһам Әлијевин халг арасында һеч бир дәстәјинин олмадығыны бүтүн милләт, бүтн дүнја ҝөрдү. 2013-ҹү ил сечкиләри Илһам Әлијевин сечки сахтакарлығынын рәзаләт зирвәси иди. Сон президент сечкиләри бир даһа ҝөстәрди ки, Илһам Әлијевин Азәрбајҹан халгы арасында һеч бир дајағы јохдур. О, һакимијјәти мәнимсәјиб вә зоракы үсулларла, өлкәдә полис режими јаратмагла ону әлиндә сахламаг истәјир. Азәрбајҹан халгы Илһам Әлијевә сәс вермәјиб. О, халгын сәси илә дејил, нәзарәтиндә олан МСК-нын арајышы илә “президент” олуб. Елан олунан 85 фаиз Азәрбајҹан халгынын сәси дејил, МСК-нын сахта рәгәмләри иди. Әҝәр Илһам Әлијев буну Азәрбајҹан халгынын она етимады кими гәбул едирсә, демәли онун бу өлкәдән хәбәри јохдур. Илһам Әлијев бу јол илә һакимијјәти билаваситә мәнимсәјиб. Азәрбајҹанда 9 октјабр президент сечкиләрини мүшаһидә етмәјә рәсми мандаты олан јеҝанә тәшкилат АТӘТ-ин Варшава бүросу иди. Һәмин бүро өзүнүн илкин вә јекун рәјиндә 9 октјабр сечкиләриндә сахтакарлығын сәвијјәсинин 58 фаиз олдуғуну тәсбит етди. Галан мүшаһидәчиләринин бөјүк әксәријјәти “күрү дипломатијасынын” фәал дипломатлары, Әлијев режиминин муздлу лобби гурупларынын әлалтылары идиләр. Рәсми мандаты олан нүфузлу бир гурумун 58 фаиз сахта чыхартдығы бир сечкини халгын дәстәји кими тәфсир етмәк “аналогсуз рәзаләтин” јени азәрбајҹансајағы тәзаһүрүдүр. Авропа мәканына дахил олан һансы нормал өлкәдә белә бир рәј елан олунсјды, һәмин ҝүн сечкиләрин нәтиҹәләри ләғв едиләр вә јени президент сечкиләри тәјин едиләрди».

Ҹ.Һәсәнли әлавә етди ки, Илһам Әлијевин гејд едилән чыхышы онун әсәбләринин јериндә олмамасынын ҝөстәриҹисидир: «Дүнән Мисирдә, Ливијада, Тунисдә, буҝүн Суријада вә Украјнада ҹәрајан едәнләр диктатор режимләринин әсәбләрини корламышдыр. Биз өлкәмизин Шимали Кореја мүстәбидлијинә истигамәтләнмәсинә јол верә билмәрик. Азәрбајҹан Авропа Бирлији илә ассосиатив сазишә ҝетмәлидир вә ҝедәҹәк, Азәрбајҹан Үмумдүнја Тиҹарәт Тәшкилатынын үзвү олмалыдыр вә олаҹаг. Нә Илһам Әлијев, нә дә бир башгасы өлкәмизи бу үмумдүнја просесиндән кәнрда сахлаја билмәз»./азадлыг/